emiliawyk

我在男人身上花了$100萬+港幣真頭痛🙂 私密分享

Added 2025-10-01 11:31:51 +0000 UTC

有時候我真係好想呻吓，大家睇完我呻就算，唔好上心，我好快又會冇事…

話說自從男朋友喺2021年因為政治原因坐監之後，我一直到今日都因為個人嘅價值觀、理念、性格、重感情，而冇離棄過佢。有睇男友坐牢系列嘅寶寶們，應該大概知道我哋嘅關係其實係點…..

好老實講，我係欣賞佢、同佢建立咗深厚嘅感情、好多嘅回憶，但睇過我寫咩嘅朋友會了解到，喺坐監前，佢都已經唔係一個合格嘅男朋友，甚至用大部份正常人把尺嚟睇，係極有問題，基本上作為伴侶可以衰嘅嘢都衰晒😂 而我走唔出當然都有責任🫨

尋日我因為搞緊一啲稅務嘢，順便就列條數睇睇我呢幾年，喺呢個男人身上花咗幾多錢。結果條數都幾驚人…

首先我要講2021年到依家，差唔多70個月，坐監有咩開支：買物資（$600/月）、訂報紙（$1200/月）、還押時期私飯（$9000/月）、買書（$900/月）、幫佢俾學費（$40000/學期）、律師費（$20萬+）、幫佢清卡數（$15萬+）、要幫佢同其他朋友交一啲不方便公開講出嚟做咩嘅費用（$20萬+）上面幅圖就是了，仲要未列晒出嚟，我只係列到2024中…..

計吓計吓，條數真係疊到去成超過100萬🙂🙂🙂 我個頭真係好痛😂

大佬呀，我100萬可以做到幾多嘢🙂 得到幾多機會？淨係擺喺度收息唔好？呢度仲要只係講緊一啲直觀費用，未講間接嘅付出，例如還柙時期每日去探監嘅交通費（$12000/月），之後轉咗去赤柱、石壁，又要差不多次次搭的士。當然冇人話我一定要搭uber/的士出入，但我住得比較偏僻，如果仲要日日搭公共交通工具，用4小時出入，之後等2個鐘探監，之後再用1-2個鐘處理佢嘅雜務，我個人真係攰到完全會失去自我，冇晒俾自己嘅時間，然後更加搵唔到錢😂

除咗交通費，仲未計我因為花時間喺佢度，而失去咗時間發展、增值自己嘅嘢。佢坐監之後，其實我嘅收入都有所減少，原因好簡單，就係我真係花少咗時間、心力、精神喺自己工作上😅 加上社交媒體環境不斷變，我需要更多嘅精力去應對，而處理佢嘅事係花費咗我好多精力。有時見到有啲網民話我要「黐」佢博出位我真係笑出聲😂

其實係咁嘅，我非常明白亦都睇得好開，付出得就唔會真係「計」，我正正亦都係因為冇「計」，所以先願意咁樣一直不斷花錢、花時間、花心力走下去，但有時突然醒一醒，都會諗，wltf？我做緊啲咩？到底我咁大方、咁有情義、唔計較得失，係咪最後就只係配有「失」？唔計較嘅「好」人係咪注定只會吃虧？😅 有啲男人花錢玩女人，係會得到陪伴、情緒價值、性愛，我呢？😂 我是哪裡來的大水魚嗎？😅🙂

有時我見到啲人對我嘅評價，雖然我唔會理啦，但都覺得好無奈😂 佢哋有啲只係睇表面，未知我真正付出幾多心力，未知我同佢嘅關係如何，就評論我對劉生嘅好，我會覺得er…ok？😂 咁樣你已經係覺得叫好？

或者有啲人因為我嘅網上性感形象，同埋後來我公開自己有溝仔，就斷定我咁樣叫「對唔住男朋友」，我又會覺得，呃，咁想點罰我？仲想我對一個對我唔好嘅人點？關你咩事？😂 莫講話對方鍾意我溝仔，就算唔鍾意，憑咩我要睇佢眉頭眼額做人，我欠咗佢？

其實有時候，好多嘢都係觀點與角度，某程度上，我而家嘅狀態可以話好折墮，亦都可以話幾好😅 起碼我就算拖住一個幾大嘅責任，雖然客觀上真係付出咗好多，但我都覺得有意義，對得住我自己所相信嘅價值，唔使同任何人解釋。

有時上網睇到啲毒鴨湯，或者有啲loser喺度鳩噏話咩女人擘大腳就得、只係貪男人錢，睇到都有少少心理唔平衡😅 究竟我哋係咪活喺同一個世界😂？由細到大讀女校嘅我，身邊全部都係勁努力勁出色發展自己事業嘅女人。我自己身邊就真係冇一個女性可以唔努力唔付出任何嘢，然後可以透過感情關係，將男性金錢揸乾揸盡😂 而我本人，仲好似係調返轉，因為我嘅大方唔計較，唔同男人講錢，所以永遠都係蝕底嗰個，好似永遠係比男人「利用」嗰個😅 所以話，我支持啲女人做loser口中嘅嗰種人（雖然我親身就冇見過），唔通要好似我咁先係醒目？

外人將「唔計較」「大方」「有義氣」，講成係優點，但真正承受緊成本、壓力、損失嘅唔係佢哋，其實又憑咩歌頌呢啲特質呢🫨 呢啲特質只係利他性強，而利他性強唔代表就叫做好，可能只係叫做蠢、好利用🫠

有時真係會覺得，我呢啲老好人半女權真係要避免沾上男人，因為我地肯付出、唔夠boundary，所以end up個個都係嚟佔便宜，仲要係大便宜，個個月至少俾幾萬出嚟嗰種😥😶‍🌫️ 回想返呢段路有時真係會覺得心很累，喺度呻吓……😓