哇靠! 交保護費給meta內部人員💰成功贖回ig 詳細分享!!!

哇!!!是真的!!!原來可以交保護費贖返ig!!! 話說，Emilia的ig經常被bam已經係一種香港傳統習俗，同打小人、舞火龍、搶包山等並列非物質文化遺產🥶 近日我IG已經開到7.0，連埋threads累計損失40幾萬追蹤，經濟及社會影響力損失不能衡量……😅

其實早在2022年頭，最大IG 1.0（emiliawyk；9.5萬follow）第一次被ban，我就已經聯絡meta內部員工（下稱Y先生）並成功復活過一次。

Y先生係黃_鋒介紹的，負責政治組，2021年我已經搵過佢幫手搞Facebook一次。

而我喺IG成日post政治新聞、文宣、個人見解，又係性別議題倡議者，好多暴動、社會衝突、性暴力相關嘅畫面影片 ，加上仲有性感照片，就被標記為各種違規，恐怖主義、極端暴力、人口販賣etc 最後Y先生成功幫我復活一次。

但到2021年尾IG 1.0再被 Ban嘅時候，Y先生就表示同高級人員開曬會，1.0佢地無能為力

但 2.0 (emiliawyk.backup；7.4萬follow)可以幫手復活，最後亦成功。

到2023年，我ig 2.0再次被消失嘅時候，Y先生已經離職，冇再喺Meta做😂 但佢都好好，一早就俾咗新嘅接手人我去聯絡😂

無奈地，嗰個接手人處事手法同Y先生唔一樣，基本上並沒有絲毫將我放在眼內，我不斷email、各種方式聯絡，基本上都係對住埲牆講嘢😂 所以2023年沒有任何Account復活，我都係重新開過晒所有帳戶，幸好粉絲們都好快assemble😘🫶

請注意，Y先生係冇收過我任何錢的。

2023年嘅時候，我已經有透過另一個KOL朋友，認識到一位M先生。輾轉之下，得到M先生嘅私人聯絡。M先生講到明，就算畀得起錢，都唔係個個會幫，只係會幫啲「有價值」嘅人。當年M先生開價「兩個部門 $6000USDT起」 （約5-10萬港幣）可以幫我取回2.0帳戶，不成功退款。

介紹M先生俾我嘅KOL朋友，當年同我講M先生幫佢復活過帳號，但唔需要咁貴，同埋其實唔太肯定係咪真係M先生幫到手，定只係Meta咁啱復活返佢帳號。

不過當年佢都confirm咗，我起家嘅大Account是絕對死了😅😆😭

當年我嘅思考係：

1. 收虛擬貨幣，感覺好不靠譜，加上我又要去買賣貨幣，整來整去，如果得個吉真係會好慘

2. 聲稱不成功會退款，但點知係咪真？

3. 成效存疑，唔知係咪詐騙

4. 我其實冇乜錢使，因為我消費理財係比較保守，大部份錢攞咗去資產增值，每個月都冇咩錢剩…

5. 雖然好想要返個Account，但感覺被勒索，條氣有啲唔順😂 Ban的又係你，收贖金又係你，玩晒啦？

綜合一籃子因素，我好猶豫，所以當年最後並冇請佢幫手，IG 2.0一直處於R.I.P.狀態，之後Account不斷被bam都冇搵佢，純粹越開越多……

直到2025年嘅七月，我已經開到IG 7.0，突然我又再多個Account被Ban。今次都好誇張下，連座😅 一個post違規，全部IG帳號一次過ban😅 於是，我又再想起M先生。已經事隔兩年，我再問清楚介紹M先生俾我嘅KOL朋友，我朋友今次可以肯定， M先生真係做到嘢，因為呢幾年間，佢都再俾人Ban過幾次，每次都俾錢M先生，每次都成功復活😂

於是，我今次再接觸M先生，傾完一輪，跟着指示，戰戰兢兢一步一步……

我本身仲喺TG問大家意見，因為都覺得大機率係會俾人詐騙，唔夠膽開心定先。

最後等咗12個鐘，真係成功復活咗我選嘅帳號!!!!!!嗰個係上年死的!!!!

除咗幫我復活帳號之外， M先生都教咗我好多嘢，包括你唔好以為你一直相安無事，冇收警告就等於冇問題。Meta隨時可以攞你歷史限動、典藏咗嘅post/story嚟搞你😂 仲有，唔好以為見到其他網紅得，就等於你都得。一嚟佢哋嘅標準唔係畫一，亦唔透明，委員會係會有自己嘅衡量標準，審視每個網紅😂 二來，你以為嗰啲網紅得，其實佢哋要不只係未被搞，要不就係背後同樣有勢力+有交保護費😂

啲對話我要保持返啲機密，唔全部放出嚟，總之溝通之後，我就知道，其實真係冇標準的。標準就係委員會話事😂 委員會覺得你太性感，太誘惑，你就係太性感太誘惑😂 其他網紅做同樣尺度甚至更大尺度的，佢哋覺得冇咁誘惑，就可以通過😂😂😂😂😂 或者其他網紅同樣係交保護費，或者同meta關係好（都係利益），有人照住，所以得😂

關於M先生呢個聯絡，我有問過幫過我嘅Meta前員工Y先生，佢話呢個聯絡係好犀利😂 基本上要係朱克伯格嘅近親朋友，最核心嗰幾十人先做到😅

佢係連呢個Meta前員工都接觸唔到嘅人：

我估計呢位強勁人物M先生，唔好理佢係咪層壓式搭上搭，淨係佢，每個月同人復活下帳戶，保守估計月球唔出奇😂 一個人佢都收到10皮啦，佢一個月只要幫10個人就有一球，然後meta又不斷殺殺殺，利用完啲網紅吸收流量，又令好多人嘅生計倚賴咗社交媒體，得閒割一波韭菜，搵到門路嘅網紅又要俾贖金，基本上係一個無限商機，網絡世界版嘅警黑合作官商勾結利益輸送…😅

不過冇計㗎喎。我而家就知道了，原來個世界真係咁運作的。要不斷利益輸送、同所有當權者打好關係…根本就算社會變得民主，都係不斷不斷有帝制下壓迫嘅事情發生，只係演變出不同形式千變萬化地出現，人生就係冇公平的，一切都係講權力……

睇完我嘅分享，唔知大家點睇？都想聽吓大家意見。最後俾大家睇吓我當日贖返Account嘅即時感受，同埋我係幾咁窮😅