男友坐牢後⛓️我有過幾多條仔?😆 第三篇: 自我強姦

Trigger warning⚠️ 有性暴力內容，請斟酌閱讀

⛓️ 按此重溫第一篇：恐怖情人⛓️

⛓️ 按此重溫第二篇：難兄難弟⛓️

上一集講完K先生，有人問我點樣同佢完嘅。其實好簡單：佢有正式女朋友了🙂‍↔️ 賽後檢討嚟講，如果我真係想食住佢，我就早早應該要同佢正正式式咁確立關係，好好咁樣傾，而唔係放置喺度由佢隨便發展，我哋本來就預設係類似fwb，慢慢又發展到好似男女朋友，當年我的確一直係好多嘢忙好煩，精神都承受好大壓力，但如果我真係夠喜歡佢，我真係夠堅定，去同佢確立關係，結局應該會好唔一樣。但老實講，我都未必真係想同佢點樣走落去，只係唔堅定係一回事，失去嘅時候都會好痛苦😂

當時我同K先生根本冇就關係好好溝通，大家都係樂在其中又一邊逃避討論咁，理所當然地，分手時亦係奇奇怪怪。大概就係，我feel到佢個心已經唔喺我度，慢慢變得疏遠，有次佢夜晚嚟我屋企，我仲見到有女仔message問佢「返到屋企未」😅 女人嘅直覺好準，我知佢一定係有啲嘢，但佢選擇唔直接同我講，而係繼續同我維持關係，但越來越淡……其實咁我係會仲難捱，因為會活喺不確定與焦慮之中。

咁樣維持咗一兩個星期之後，雖然K先生冇明言，但我基本上都sense到我同佢冇㗎啦😩 由於當年嘅我，將所有嘅壓力舒緩投射曬落K先生（男人這種生物）度，我變得非常焦慮恐慌，我好驚K先生一旦離開我，我就會冇咗個精神倚靠，冇咗個肉體支援😅 唔係講笑，用咗男人嚟逃避壓力，真係同吸毒冇乜分別，淨係想像到可能有機會無得吸男性荷爾蒙，我就已經覺得好痛苦。於是，喺K先生疏遠我嘅嗰一兩個禮拜，我決定來個改革開放、突破自己玩app！

以下呢件事，我都冇同好多人分享過，都可以算係一直放喺我心底嘅一個惡夢、陰影……

我一玩app，2日已經係有幾千個likes😂 27歲人，第一次用交友app，好快就約咗第一個人出嚟，當時我係諗，我一定要改革開放，唔可以再做被動，唔可以封閉自己！

第一位約出嚟嘅男嘉賓，P先生。佢外貌正正常常普普通通，身高正常，外國大學畢業返嚟，喺投資銀行做嘅，我哋都有啲唔係好熟嘅共同朋友，圈子有少少重疊。但其實…佢一睇就唔係我杯茶😂

當時我哋約咗食lunch，而我可愛美麗嘅外殼底下，精神狀態都頗為明顯有d問題😅😂 緊張、焦慮、少少跳掣😂 因為我長年面對來自我自己嘅網絡事業、政治、經濟、經營關係等等嘅壓力，實在overload😅

當時食晏，係去好local嘅小店，食上海菜，AA的。傾偈都係好簡單咁傾咗啲有的沒的，我份人唔鍾意講大話，好直，加上當時我精神狀態都頗為神奇，我係直接同佢講：我係人生第一次玩app，你係我玩app第一個約出嚟嘅人，我近排好焦慮，而家好緊張，其實唔係好識應對咁樣嘅約會，因為我人生從來冇試過咁樣去同陌生人約會，之前嘅3段關係，都係好長的，而且都係一啲本身已經認識嘅人去追求我，我完全冇試過主動用約會嘅前提，去reach out陌生人。

佢就話：「咁我咪好好彩？」 然後叫我放鬆啲咁去面對，約會係好fun的，諸如此類😀

跟住傾傾吓，佢無啦啦問：「等陣去開房好冇」😅

我當時係即刻心跳加速，勁緊張😅 完全唔識點樣應，光天化日食緊晏，普通傾偈好地地，無啦啦咁問😂 我從來冇試過陷入呢個狀態😂 我本身就好少同男性單獨相處，更遑論第一次見，就無啦啦問我等陣好唔好即刻開房😅 我諗我個樣都係寫住勁緊張，我直接同佢講：「我唔肯定喎，我未試過咁做。」

當時我內心係諗：既然我而家要改革開放，我都應該要鼓起勇氣嘗試吓不同嘅關係，可能係我改變自己嘅契機，唔好下下咁保守，因為個人保守，唔想接受不同類型嘅關係，所以先會俾以往嘅有毒關係限死，其實我係可以試吓casual，但我唔肯定自己係咪ready，但又好似可以試……

P先生就話，咁好，食完飯行吓你慢慢諗。於是離開咗餐館之後，我哋就喺周圍散步，點知一路散步，佢竟然係一路同我行緊去一間酒店😅

當時其實我嘅精神狀態係有少少混亂，分分鐘個樣都明顯唔係咁精神😅 之後佢話入去問吓前台有冇房，我都冇講啲咩，然後佢出返嚟話冇房，當時我仲鬆咗一口氣😅 我話，咁我哋而家各自返屋企啦…

點知轉個頭，佢入多去問一次，竟然又無啦啦有喎😅 （我而家寫返呢個經歷出嚟，都覺得好緊張，寫到我有d uneasy😅） 於是我本着「唔緊要試吓啦」嘅心態，「要俾啲勇氣接受新嘅嘢！」 冇乜出聲咁樣就同佢行咗上房😅

過程我就唔想詳細描述啦。一般嚟講，我係一個頗為主動同埋享受嘅人，但嗰次呢，我係全程冇郁過，就咁攤喺度，個人仲要僵硬晒，不斷同對方講我好緊張🙃 我懷疑個樣都頗為似一個黐線婆🙂 明顯精神不穩定😅 而對方就不斷話我真係好正、身材好好、又靚、有前有後、又可愛、好難得有個身材咁正嘅人、sex is fun、唔使緊張放鬆啲…😅 聽到佢不斷咁講，我都完全冇投入，我個人係變得更加混亂，因為我根本唔肯定我真係想同呢個人發生關係，亦都唔覺得佢吸引，亦唔鍾意佢，而且做咗咁多年人，從來冇試過咁隨便😅 聽到同見到佢好享受咁，而我一啲都唔享受，仲好緊張僵硬，又冇乜感覺（佢好細，都好在，如果好有感覺我應該仲崩潰），我就覺得自己好似蝕晒…🙂🥲

我都唔知過咗幾耐，應該都唔係好耐，總之完成咗（？）佢攬咗我一陣，之後就話去沖個涼。然後我完全呆咗喺度，個腦空白，好暈好呆，完全係一個震驚嘅狀態，我諗嗰刻我爭啲要入青山😅

之後我趁佢沖涼，粒聲唔出走咗去😂 搭的士自己返咗屋企😂

去到夜晚，我諗返起晏晝發生嘅事，我開始呼吸困難、心口好痛、全身震晒、對眼睇嘢越嚟越黑、然後不自主咁係咁大嗌同埋喊😅 正常人驚恐症發作，可能幾分鐘都可以平復，但我係維持到凌晨3/4點，都係處於呢個狀態，起碼8個鐘😣 呢段時間我不斷打俾我唔同嘅朋友，都有打俾K先生，但冇講咩事，淨係話我精神好唔得，然後喺度大叫大喊咁，去到凌晨就打俾喺外國嘅朋友去接力……做情緒支援……

後來我分析過了，其實我當時根本係冇精神行為能力，等於一個弱智/精神病/未成年。我根本精神太過衰弱，冇足夠嘅心智去幫自己決定去唔去發生呢個關係，只係表面上應承咗，又傻鳩鳩跟住佢行😅 所以，我個身體/精神，實際上係覺得自己被強姦咗，所以先會導致我之後panic attack 八個鐘，而且仲用咗好耐好耐先比較放得低呢件事，期間好多時候，我都不由自主會諗起嗰個下午，然後又會出現呼吸困難等等嘅精神失調症狀🙂

其後好長嘅一段時間，我做咗好多自我和解，不斷學習去原諒當時精神不穩定嘅自己，原諒自己喺呢件事上，冇好好保護我哋自己，強迫自己去接受自己未ready嘅關係，導致到發生咗呢件本質上同強姦無異嘅事。

我完全冇怪P先生，我傾向鍾意自己承擔所有責任。因為責任在我身，先代表我有權力去改變、進步、學習。雖然我當時可能都明顯精神不穩定，但我又的確真係自己跟住佢行上去，唔可以怪P先生😅 佢之後仲有持續1-2年，不斷喺IG DM我，持續單機，係咁想約我，睇嚟係食過返尋味😂 我冇理過佢，一句都冇回應過，仲直接放咗佢去垃圾訊息，直至我嗰個Account被Ban，佢都係持續想搵我翻兜😅 咁可能我真係好正掛，唯有正面啲咁睇 lol

唉，人生第一次嘗試改革開放，就搞到咁😅 發生咗呢件事之後，我精神狀態係更加不穩定😅 但呢個不穩定，係令我更加堅定，我一定要快啲突破到自己某啲嘢…雖然唔太睇到其實係咩，但好似真係唔可以繼續咁嘅狀態，所以當時我係休息咗幾日，然後又繼續我嘅改革開放之旅……但而家諗返，其實呢次嘅經歷係成為咗日後嘅養分，去令我變成一個更加知自己想點、更加識得保護自己、更加堅定、更加強嘅一個人……

隔咗幾日，太過精神嘅我又再次踏上約會嘅路，今次我遇到嘅人冇咁獸性，又有其他嘅發展……

下回待續