男友坐牢後⛓️我有過幾多條仔? 😆 第一篇：恐怖情人

我想講，其實起碼有2年以上，我一直有公開講我一邊無條件照顧坐監嘅男友，一邊都有溝仔玩app😂 而事實係，其實喺條仔坐監不足2個月後，我已經迅速有第二條仔，同時繼續每日探監、課大金俾佢、風火輪咁無間斷處理佢嘅事務😂

冇錯，開頭1年幾，我係比較低調，冇特別強調自己嘅私人感情事（同劉的感情事不屬於私人😂），但記者問我點解要對劉不離不棄，「犧牲咁多」，我都會強調唔係因為愛情，亦唔覺得係乜嘢犧牲，而係應份要做嘅事😂

2022年開始，我實在再忍受唔到成日被扣「好女人」嘅帽子，彷彿我所有嘅付出，都只係因為我係某人嘅附屬品+戀愛腦😂 於是，不斷公開宣揚要做「壞女人」，不要貞節牌坊，成日公開講我溝仔嘅嘢😂 唔知點解係去到2025年，啲人先好似發現新大陸咁討論😂 可能因為呢半年，我post多咗而家仔仔嘅相吧，令啲對圖像敏感、對文字冷感嘅人特別興奮😆

既然大家咁有興趣知，我就喺度寫多啲同大家分享吧 lol

以前我會唔夠膽透露以下嘅經歷，但因為我而家自覺走過咗、睇開晒、更強大，所以唔介意同關心我嘅大家分享了🥹😘😂💗:

首先要講一講我同「男朋友」即係監躉劉生本身嘅關係背景😂

我哋2014年喺中大相識並一齊，當時我19歲。其實一開頭我有話唔想一齊，但佢攻勢好猛烈，我被love bomb了，有一種又甜蜜又不知所措嘅感覺👀 而且佢對我嘅態度好奇怪，大起大跌，後來先分析到類似係躁鬱症嗰種：一時你係佢全世界最愛嘅人，一時佢可以突然脾氣爆發大吵大鬧掉嘢，當年入世未深嘅我，完全唔識應對，又驚又緊張又感受到好強烈嘅情感交流，於是類似喺半推半就之下就一齊咗。

2015年我離開香港4個月，去美國某Ivy League做交換生，2015年12月打算俾個驚喜佢，為咗佢提早返嚟、放棄繼續喺美國遊歷，靜靜雞返到香港再去佢公司接佢，點知撞正佢同女同事拖住手😂喺我各種嘅調查下，發現呢段期間佢仲同個女同事靜靜雞去咗個旅行，女同事仲有咗，但因為女同事係有男朋友嘅（lol），所以唔肯定爸爸係邊個😅 （後記：個仔係生咗出嚟嘅，所以到呢刻都唔知某人其實係咪已經做咗爸爸😂）

咁我當然接受唔到，即刻提出分手。點知分手之後，佢繼續死纏爛打，各種攻勢，喺街度跪地撼頭、日夜喺我樓下等我、喺立法會發言嗰陣示愛（？） 、我話要同佢分手就大叫丟嘢、不停換電話打俾我、我甚至因為想避開佢而靜雞雞搬過屋……當年嘅我真係唔識應對：一個本身心軟、重感情嘅人，第一次遇到咁無賴嘅人😅 加上學業、兼職、社會運動等等嘅壓力，全都要花時間心力去處理，仲邊有心力處理咁麻煩嘅感情？🥲 我當年嘅精神狀態都唔係咁好，對於呢段感情，我係覺得無能為力：對方脾氣古怪、不斷溝女、得閒偷拍我放上啲流出group、經濟上倚賴工作都好辛苦嘅我。我補習全日賺嗰$1000，自己都死慳死抵，周不時淥個米粉當一餐…..但轉個頭，佢就要求去食幾百蚊壽司，唔就範佢就鬧人大吵大鬧，埋單嗰陣佢老馮唔會攞銀包出嚟，次次都係我埋單，佢多謝都冇句…總之咁樣嘅生活令我好辛苦，但我又唔知點解走唔出，仲搞到我有抑鬱同少少幻覺😅

我不斷想分開，但因為對方攻勢太猛，而我精神狀態唔好、心軟，唔知點解對佢產生咗某種倚賴，甚至因為佢而少許疏遠咗我自己好多嘅朋友，佢仲成日pua我，令我覺得除咗佢之外，冇人可以真正鍾意同了解我…總之，往後一段好長嘅時間，我一直處於好似點都同佢分唔到手嘅狀態，係一個又愛又痛苦嘅黑洞之中，期間都無數次捉到佢作出軌，或者真係出軌😅 去到後期我都麻木咗。

呢個男人仲有一個特色：就係成日好想我有其他男人😅 一齊嘅時候，佢直頭試過幫我約炮，想我喺佢嘅安排下同一個消防員做愛做的事，仲已經同對方溝通好晒😅 我話接受唔到之後，佢就轉移同我談判，後來我話可以接受到試吓同認識嘅人，佢都真係有去搵人選、問對方，但後來人哋覺得佢黐黐地線😂😂 件事都不了了之。

總之 2014-2021年呢7年期間，雖然佢各種出軌，同埋各種安排想我試吓其他男人，但我係沒有嘅😂 維持住都係得佢一個😅

我係鍾意影相俾人睇，會用影大尺度去釋放壓力。但我係鍾意俾人睇，唔係鍾意俾人搞，我根本唔鍾意隨便發生關係，甚至因為被生活累垮+被操控者洗腦，我一直缺乏主動認識人嘅動力，所以先會好似封死咗喺呢段關係裏面咁。keep住想分手，但又分唔到，離離合合，期間各種剝削及有毒行為，段關係極toxic☠️

佢喺外面嘅時候，其實有其他條件唔錯嘅男仔追過我，但當年我嘅精神狀態，係完全冇能力接受追求，或者接受另一個人。總之我淨係處理學業、兼職、社會嘅事、開始經營網絡等等，已經幾乎透支曬我所有力氣，應對呢段感情，我真係深感無能為力。

2021年，佢因為初選被捕。

當年我身邊所有朋友，包括佢嘅朋友，都認為呢個係一個好好嘅契機去擺脫佢😂 （佢啲朋友知道佢啲衰嘢全部都幫我笑死😂）

不過，我覺得佢對我衰、我同佢嘅關係toxic係一回事。佢因為不公義嘅事而受難，係另一回事。離離合合嘅一面係toxic，但另一面係我地有感情有依賴、有好多欣賞大家嘅地方，所以能夠不斷合。（我講佢嘅優點大家可以睇返公開媒體報道）

我本身係一個比較重視價值觀、個人修為嘅人，政治上我都有某種取向，亦有朝向嗰邊努力。喺我眼中，佢因為政治而坐監，件事本質上係極大嘅不公義，所以我認為，我地所有時候都可以分開，唯獨佢受冤獄嘅時候唔可以。

於是我係喺2021年先公開咗我係「XXX女友」嘅身份，目的係等我可以幫佢處理更多事務同代言。我本身都係一個網絡人物，在此之前喺公海嘅紀錄嚟講，我嘅感情狀況一直不明😂 不明都係合理，因為我自己都唔知搞緊乜😂

所以我而家「好多仔」嘅前提係：

1 我本身都不想承認呢個所謂男朋友 係因為實務原因 為咗佢好 所以先認住先

2 本身都係想同佢分手多年 佢稱得上恐怖情人

3 所謂正印男朋友享受並鼓吹我比其他仔溝

背景交代到嚟呢度，下篇再寫溝仔Stage 1，即係監躉入獄兩個月後，我就同咗另一條仔一齊，劉全程參與…..😅仲有好多個stage會寫的😂 大家有興趣就留個言，鼓勵下我寫吧😆