吸毒 - 我的家庭🙂 身世大揭秘

（此系列照片本月內繼續更新其他Tier🤍）

話說前日無緣無故有人喺IG story誹謗我，話我呢啲KOL吸毒、呃人錢，連帶影響佢曾經都喪吸毒😂 無中生有嘅指控實在係令我摸不着頭腦，驚嘆世界上黐線嘅人何其多😅 （關於呢單黐線嘢嘅詳情我post咗喺TG group：https://t.me/theemiliawyk 入唔到group嘅朋友，呢個post拉到最底我會重複講一次呢單嘢）

我無論係私底下嘅真實生活，抑或公開嘅形象，都根本同吸毒係沾不上邊😂 就算我成日鳩噏，都好似從來冇公開提及過任何同吸毒相關嘅嘢，原因係我嘅世界根本冇吸毒呢個活動😂 吸毒於我嚟講，就好似Bill Gates屋企裏面第三個工人條底褲咩色咁，根本唔喺我世界觀裏面，從來唔係啲咩我會俾Attention嘅嘢😂

而家嘅我，對吸毒呢個議題係冇咩大嘅感覺或者看法，我覺得對任何嘢上癮，不論係毒品、性愛、興趣、食物，都一定有佢嘅壞處，但都係嗰個人自己要處理嘅課題，我哋唔知人哋經歷咩，所以我唔會好容易就標籤人「吸毒一定係廢人衰人」。

但其實曾經嘅我，都好受「吸毒」影響，曾經我係好憎人吸毒、好討厭毒品，所以直到而家，我都好肯定自己一定一輩子唔會掂任何毒品。

至於點解，我決定喺度同各位關心我嘅寶寶分享吓我嘅家庭背景、成長經歷，好多嘢連我身邊嘅好朋友都未必知，因為我唔會想無啦啦講自己嘅事，去博人同情定點：

我女拔畢業，又讀中大法律，又去過Ivy League、清華大學做交換生，好多人認為我出身小康，但其實並唔係，原因就係因為吸毒。

細細個嘅時候，我屋企的確係小康之家，阿爸做生意賺得唔錯，阿媽做會計，住香港島名牌私人屋苑，三人小家庭三房兩廳單位，我從來唔缺任何物質，由細到大亦都係讀私校嘅。

直到有一年，我阿爸好似話因為做生意壓力太大定點，不幸患上咗情緒病。情緒病都唔緊要，個病係有藥食有得醫嘅，但更加不幸地，佢對嗰啲精神科藥物產生咗倚賴，造成咗一啲上癮嘅反應。

雖然嗰啲藥並唔係犯法，一開頭都係用嚟治療，但上癮咗之後，佢開始一發不可收拾，會自己亂咁調校劑量，生活亂晒籠，亦都冇辦法再經營生意，一直倚賴嗰啲藥物去鎮靜自己、逃避、減輕佢情緒病嘅痛楚，一直走唔出。

於是，我開始家道中落。我原本係一個小公主，細細個已經有自己一間公主房，後來搞到賣樓，然後我哋要寄人籬下。我阿爸就俾佢嘅兄弟捉去嘗試幫佢戒毒，但一旦上癮邊有咁容易斷？上癮喺一個好複雜嘅topic。我哋本身感情好好，但因為上癮，我哋好少可以再見，而且佢周不時做出一啲神神化化嘅行為，惹上咗一啲奇奇怪怪嘅人，令我都好徬徨好傷心。

雖然我阿爸係喺好不幸嘅情況之下，對一啲合法嘅藥物產生倚賴，嚴格嚟講唔係「吸毒」。但某程度上，我認為都係吸毒嘅一種，因為係對藥物嘅濫用同倚賴，至少都係好似吸毒咁，嚴重破壞咗我哋嘅家庭幸福。

所以，我由細到大都好憎任何類型嘅毒品、好憎吸毒呢樣嘢，當中亦包括好似我老竇呢種，濫用本來合法嘅正常藥物。直到上咗大學之後，我個人先對呢樣嘢冇咁怨毒/judgemental，會多啲理解到吸毒只係一個表徵，亦都有好多唔同嘅吸法，唔一定會上癮依賴，而且背後嘅原因千樣百種，唔使一竹篙打一船人覺得任何對藥物嘅濫用都罪大惡極。

我嘅家庭狀況喺我出身之後，即係大概我讀咗大學自己有補習教班賺錢，我媽事業亦都重上軌道，我阿爸病情亦都有好轉（冇錯，佢掙扎咗20年）個人變得正常少少同埋有工作能力，先至開始慢慢轉好。

所以，我個人嚟講，係絕對絕對絕對絕對唔會掂任何嘅hard drugs，我好清楚呢啲毒品一旦上咗身，係可以點樣影響一個人以致整個家庭。我係睇住我阿爸從一個好聰明成功嘅生意人，幽默又靚仔，變成一個不斷掙扎嘅病人。雖然佢嘅狀況係始於不幸，但我認為中間有好多位佢絕對可以做得更好、更自律。

我唔知嗰個同我無冤無仇嘅陌生人，點解要無啦啦指控我吸毒影響到佢喪吸毒 lol 我人生從來係冇掂過任何嘅hard drugs，我連一支香煙都係冇食過。如果真係要講嘅話，勉勉強強咁樣去聯繫，我唔介意講大麻我係掂過幾次，每次都係一啖，次數係五隻手指內數得晒，而我亦從來冇公開去鼓吹或者宣揚呢樣嘢，甚至連提都冇提過。雖然大麻唔係hard drugs，而我個人定義下煙酒都係衰過大麻，但我又唔係專家而且我亦唔係鍾意食，亦沒有食嘅習慣，純粹因為social嘅關係食過一兩口，但始終都係會影響身體感官嘅嘢，所以我唔會無啦啦公開講話自己隊草好威威，我就嚟30歲人，先食過幾啖，有幾威😂？我亦從來冇公開宣揚/提及過呢啲咁樣嘅行為，更加唔會鼓勵任何人食，因為呢個行為根本係冇必要，就好似飲酒食煙咁，而且你食唔食關我撚事，我有咩必要無啦啦去講或者去鼓勵人食😂 ？

我嘅生活基本上就係：影相、寫文、出post、做gym、陪阿媽、陪朋友、做瑜伽、睇戲、睇劇、睇展、攀石、打拳、拍片、去吓旅行、搞吓股票、試吓新餐廳。而家我講緊係連酒都差唔多唔飲，因為做gym之後我知道飲酒好影響肌肉發展，一年我都唔知有冇飲到2-3杯，都係出去Social嘅時候如果嗰度啲Cocktail好特別我先會試吓，如果冇咩特別我都係會飲無酒精飲品。

我之所以咁自律地生活，唔係因為我喺度自我感覺良好，而係我生活本身有好大嘅壓力（政治、事業、理財投資），好多壓力我係唔可以公開講嘅，否則會有好大後果。如果我唔咁自律，我個人真係會精神有問題、真係會黐線，所以我自律係因為我唔想搞到自己精神有問題後，要步我爸爸嘅後塵，更遑論我會自己無端白事走去吸毒，無啦啦去影響自己嘅智慧、精神、生活、賺錢能力、人際關係。

好多謝你哋睇到你呢度。雖然我知嗰個人根本冇影響力，我冇咩需要無啦啦澄清自己冇吸毒😂 下次唔通啲人話我其實個陰道裏面係生咗條J，我就要擘開晒個陰道俾人睇？只不過呢件誹謗事件令我諗返起好多陳年往事，亦睇到自己多年來價值觀嘅一啲改變、一啲堅持，有少少慨嘆一路走來嘅路，所以突然都想同大家分享吓我嘅家庭背景、成長經歷。

多謝大家🤍 愛你哋🤍

以下post返傻人對我嘅指控 lol 以及我嘅回應：

我嘅回應： 今日朋友send咗一個人嘅story俾我，我覺得好黐線😅 我同呢個人無冤無仇，佢無啦啦指控我吸毒、「呃本金」（唔知即係乜嘢意思？）、diss 男性困境（我幾時有 lol？）。

講真，第三點扭曲我價值觀都算，始終我可能講好多嘢，唔同人有唔同解讀，或者有時講笑反諷又俾人當係認真，呢啲都唔係咩大件事。

但第一點講到我吸毒、第二點其實唔知想表達咩但估計話我呃人錢，呢兩點都係specific得來無中生有，完全憑空捏造😂😅 我人生冇掂過任何hard drugs，亦都從來冇公開美化過吸毒，甚至喺我嘅網上發言當中係從來冇mention過吸毒，因為佢完全唔喺我嘅世界當中lol 我諗你叫網民評論下對中大email嘅印象，佢哋可能會話「肥」「臭雞」「女權」「黃屍」「賣相」，數到第9999項，都未必會數到我吸毒😂 無論係我嘅真實生活定網上人設，我根本都同毒品毫不沾邊 lol 之後呢個人仲要推進一步，講到係我影響到佢吸毒？？完全九唔搭八？？？

第二點「呃本金」完全唔知佢表達緊咩😂 即係話我呃人啲退休金？呃人錢？呃咗人嘅投資本金？ 完全黑人問號😅？ 又係冇證冇據憑空捏造😅 OK有啲人會覺得我收patreon課金係「呃錢」，但我明碼實價、童叟無欺，你哋主觀想法係改變唔到我冇呃人嘅 事實。除非呢個人係想講patreon（但我認為佢唔係），否則我點樣有呃過人任何錢？😂 啊係，我仲有客串做ATM女王，有啲ATM奴會要求我收佢哋錢，但都係講緊幾千蚊之內嘅事，都係一買一賣冇任何欺騙成份😂 除咗呢啲嘢之外，如果有任何我呃人錢嘅情況，我歡迎任何人攞條數出嚟對質😂 我幾年幾月幾日呃咗你幾多錢，用乜嘢方法呃，攞出嚟放上連登講、同警察講、報東張西望等我雞毛鴨血😂 老實講，我十分建議呢啲人報警拉我，因為報警一定可以還我一個公道 lol

第一二點，都係完完全全可以令一個人社會性死亡+坐監嘅指控。我好surprised 有人可以隨隨便便喺完全冇證據、not even有端倪嘅情況之下憑空捏造，講到頭頭是道😅 呢樣嘢唔係唔尊重我，而係唔尊重你自己😅 大佬呀你屈我日日群交都可信過佢我吸毒、「呃本金」（完全唔知表達緊咩）啦😅

成日俾人咁樣生安白造，我都唔奢求咩道歉，我要求好低，老實講我只係希望啲人唔好成日無端端屈鳩😂🙏🏻

老實講重複多次，我真係又吸毒、又「呃本金」，我建議你哋報警唔好喺度鳩噏，呢兩個指控足以令我坐30年😂 就睇吓會唔會囉😂