emiliawyk

【真事】凌晨4點被嚇醒一裸男身影喺我房門口望住我…膽小者勿入…

Added 2024-09-19 16:00:06 +0000 UTC

各位寶寶好🥹 話說我呢兩個禮拜都好靜咁，原因係我身體同精神都休養中。月頭發生咗件cls嘅事，之後我就一直病唔好、低燒、半夜驚醒訓唔到，係呢兩日先開始好轉，可以喺度同大家交代下。

話說月頭某夜我有d唔舒服，低燒38度，於是我send 定message俾PT，話聽日視乎情況有機會出唔到去上堂，但我認為我好好咁瞓一晚，應該就會好返。然後我就好乖咁去咗瞓覺，期待身體快啲復原可以繼續好好生活同埋運動。

點知，獨居嘅我凌晨四點突然俾一啲聲音嚇醒，我一擘大眼，就喺黑漆漆嘅環境中見到我房門口有個男人嘅身影企咗喺度，我即刻坐咗起身，望真啲我仲要見到個男人冇着衫全裸。當下我個腦閃過好多念頭、後果、應變方法，不過我把口就好冷靜咁講咗一句：「做咩事呀？」

個男人冇出聲回應，淨係慢慢咁樣行過嚟我張床度，然後佢成個人停咗喺我個身上面。過咗一陣，佢再瞓咗喺我隔籬，我即刻再彈起身，去咗床尾望住佢。

呢個時候，其實我已經意識到佢係一個我識嘅人，係一個同我分開咗好耐冇聯絡冇溝通嘅ex🙂‍↕️ 雖然我認識嘅呢個ex係好溫馴嘅，但佢突然做啲咁爆裂嘅行為，我真係唔知佢呢刻想點。

佢仍然係唔出聲，我喺床尾望住佢，佢就喺床頭望住我，好似expect我會返返去床頭嘅位置，同佢一齊瞓覺咁😅 我再問佢：「做咩事呀而家」佢終於開口講嘢：「唔好意思呀，我都唔想咁㗎，我飲多咗啲，我聽朝會走㗎啦，唔會騷擾到你」…

N耐冇聯絡，佢無啦啦爆格入我間屋，跟住expect我同佢瞓一晚？？？我知道佢係喺蘭桂坊嗰邊飲酒，佢自己就住旺角嘅，而我就住大西北，佢call車返旺角只係需要3個字，去我屋企就要成個鐘仲要貴三倍，佢一定唔會係喺冇選擇之下先走來我屋企😅 就算冇選擇，我屋企都唔會係一個選擇囉😅 我發現，佢除咗爆格入嚟，仲喺我沖涼房度沖咗個涼，然後先至唔着衫過嚟我間房搵我😅

我好冷靜咁叫佢返屋企，話佢唔可以喺度留低。跟住佢話自己唔見咗電話，又唔見咗銀包，我話咁我幫你call車，嗰陣時已經係凌晨4:30，然後佢又話自己唔見咗件衫，於是我又要求其搵一件好大嘅衫俾佢着😅

幸運地，我call到車之後，佢係肯走嘅，我好似送瘟神咁送咗佢走。當時我個人已經由低燒變成發高燒，而且咳得好犀利😅 當我仲喺度嘗試消化呢件事嘅時候，5點鐘左右uber司機打俾我，話我個朋友喺佢架車度嘔…😅 嗰陣時我都好混亂，我直接叫司機報警，並且講咗呢件事俾佢聽。個司機好好，佢叫我小心啲，同埋快啲換咗大門個密碼，然後話唔再追究。我見佢咁好，收線之後我都係tips嗰度俾返幾百蚊清潔費佢，唔好要人蒙受損失。但我自己就心理好唔平衡，本身我已經病，仲要無啦啦俾人爆格、俾個來歷不明唔知有咩企圖嘅裸男上自己張床、戰戰兢兢咁樣用幾百蚊call車送走佢，之後再要俾多幾百蚊清潔費。成件事簡直可以用撞鬼嚟形容…..

以下俾大家睇吓第二日我哋Text嘅內容：

酒醉三分醒🙂‍↕️ 要不弱智，要不擺明為咗做呢件事去借醉。佢以為我會有咩反應？本身佢喺我張床，仲話咩佢stay到聽朝就會走。根據uber司機所講，送咗佢走之後，佢應該喺佢屋企附近盪來盪去，又無電話又無剩，不過我都唔理得咁多😅 佢call車嘅時候係仲有電話，點解佢唔直接call返自己屋企 which 係中環to旺角，而要係花多半個鐘山長水遠去我屋企？顯然所有野都係一個act，佢特登飲醉去做藉口等佢可以說服自己咁做，或者天真到覺得我會因為佢醉咗接受佢咁嘅行為。

雖然最後佢冇對我做啲咩，但當下我點知佢想點？會唔會只不過係懸崖勒馬？我凌晨擘大眼見到一個不明男人身影喺自己間房嘅時候，嗰刻直頭諗我係咪今日就要死，係唔係要死得不明不白，係唔係要俾人折磨完一輪先死。唔係我諗多咗，而係正常人會猜測嘅嘢。就算後來知道係個ex，我都冇辦法放心，因為無論佢以前個人幾純品，無啦啦做出呢啲極端嘅行為，我都唔知佢嗰刻係咪跳咗掣，照樣會傷害我，有時人無啦啦發癲係好難預計。而且我知自己同佢力量懸殊，體型差異接近兩倍，我九成九係打唔贏，嗰刻都真係幾徬徨。佢走咗之後好唔舒服平復唔到，本身安排咗嘅活動都取消晒，及後好幾日我都瞓唔好，有時瞓咗一陣就會唞唔到氣，有種窒息嘅感覺喘着氣扎醒，心跳率一直爆高。然後每晚凌晨四點左右，身體個本能又一定會自動彈醒，睇吓門口有冇人😅 總之就瞓唔好休息唔好，於是個人越嚟越病，仲搞到我連行步路都踢親隻腳趾尾拗柴，而家行路都拐吓拐吓😅

如果大家想睇我點樣追討佢，我下一篇再寫…🙂‍↕️