emiliawyk

【心事台】探監鍛煉的耐力和紀律？

Added 2021-08-20 13:42:03 +0000 UTC

話說呢半年近乎每日都出入監獄或者法庭，只有幾日因為家中有事無辦法去到。

以往雖然都係忙碌，但係因為工作都彈性，經常通宵達旦咁樣做嘢直播寫文拍片，太陽出嚟先瞓覺，因此亦好多時瞓到好晏，個人雖然比較creative，但都好似冇乜energy咁，更加唔好講話有時間運動嗰啲…

但呢半年，我懷疑探監人生幫助到我建立更自律同健康嘅生活作息😅 有朋友同我講，話佢運動係為咗令自己精神更集中、更有紀律去應對生活，但我就發現，我係探監訓練到我嘅紀律，然後就用呢個紀律去咗做運動🤣😂 每日都要早起身，帶齊晒所有嘢，喺入面等個幾兩個鐘，第二日又再重複，然後夜晚又寫信…真係冇啲耐力都唔得😂

依家踏入運動第三個星期，因為報咗班，所以每個禮拜都會有兩日1hr 嘅鍛煉 + 40mins帶氧運動，嚟緊仲會一個星期多一堂打拳，而喺無運動班嘅日子，我幾乎每日都會刻意去行路令自己活動多啲…除此之外，因為被逼打點各樣野，所以我個人都變得更加外向，唔再怕多人嘅地方，亦都唔會覺得見人令我好唔舒服，都係一啲好嘅轉變😅

我覺得之所以有呢個動力，好大程度上都係因為受嘅政治打壓，令我被迫變得有紀律起嚟😅 慢慢發現除咗自己本身做緊嘅嘢，原來我都可以做更加多有益身心嘅活動，變成一個更好嘅自己🥺 但我覺得，令生活變得更active更energetic之後，我下個目標就係pick up更多搵到錢嘅工作，希望可以同時兼顧所有嘢，令個人變得越嚟越好🥺

不幸嘅係，雖然我活動量大增，但食量都因此大增（因為成日做運動真係會經常肚餓😂就算一日仍然只係食一至兩餐，但個份量會多咗），所以過咗三個禮拜之後不但冇瘦到，體脂好似仲增加左0.5% （不過其實去個廁所都冇咗㗎啦～），只能夠話體型上應該冇乜轉變😂 不過我一開始都唔係為咗要減肥或者點，我最主要係想整個人健康啲、有活力啲、心肺功能好啲咁解😚☺️ 以前一年都唔知有冇兩日會做運動令個heartrate >140，依家一個禮拜都有兩日🥰👻💜

圖為gym後沖完涼影嘅相，冇肥到冇瘦到，但我諗心肺功能會好咗，整個人會健康咗掛！😂