心事台
Added 2019-08-12 19:56:06 +0000 UTC最近每一日都好多刺激同變化，我小小嘅心臟唔係好承載到。每一日都唔夠訓，每一日都處於相當緊張同繃緊嘅狀態，一次過處理好多野又要夠快夠準..😫 我覺得因為咁，我又殘+腫咗好多😫 大家都應該記得我講過，有啲人有壓力係會瘦，但我係會肥腫，仲可以腫到眼皮都腫埋（最主要係睡眠質素差）😂 然後我最近眼紋都好似多左😫
有時都會諗，其實呢個運動最終會變成點，會點樣完呢？我一直都覺得今次運動，其實係雨傘嘅延續再進化，姐係話，就算今次我哋嘅訴求未達到，然後完咗，可能過幾年會再爆一次更加大嘅。無論如何，我完全想像唔到，亦都唔敢想像場運動會點結束...係咪要重演六四？係咪要死多幾個人？我真係唔知，唯有喺咁嘅環境下，一面抗爭一面苦中作樂下，同埋驚嘆一下香港人幾團結同叻叻🙌🏻🐷
Comments
其實有冇諗過，都已經係"一國" 啦，"兩制" 亦過左一半時間，既然大局已定，不如係既定環境下發掘自己嘅優勢，開拓自己嘅未來好過啦。 好多時焦點集中一件事上嘅時候，會比較容易忽略左其餘更多重要嘅野，人一生中要做嘅事仲有好多，你今日可能會好執著咁話比我知，你所做嘅事非常值得，但只要你好彩冇為此而殉命，係十年，二十年，三十年後... 你絕對會對今日嘅你有另一種睇法，道理好簡單，就好似你而家睇返小時候嘅你，會覺得好傻好低能一樣，但如果你冇左條命，就連思考嘅機會都唔會再有，生命冇take two，時間走左亦唔會再返嚟，唔好係一件冇可能即時會有答案嘅問題上花太多時間，亦唔好期望人地可以比到啲咩你，最實際都係問下自己可以做到啲咩。 我第一次接觸到你所寫嘅野，好有理想，好有正能量，但係，而家... 似乎走到左樽頸，希望你可以諗得通，好好訓個覺休息，訓醒之後利用你所學，從新出發！😘
Joey
2019-08-12 23:27:12 +0000 UTC
