emiliawyk

我在伊朗沙漠的浪漫邂逅

Added 2019-04-06 20:12:42 +0000 UTC

有留意我ig嘅應該都知道，我同kimmy兩個異族喺伊朗好受歡迎🤦🏻‍♀️ 咁多日以來日日都被搭訕攞電話，亦比好多人帶咗我地周圍去：雪山、大河...仲有人送花比我地。但令我最深刻嘅一定係沙漠遊嘅司機大哥Amir。

喺一望無際嘅沙漠，開住擋風玻璃裂咗、鋪滿泥濘嘅越野車，播住異國嘅音樂，喺顛簸起伏嘅路上風馳。Amir 英文都唔識講兩句，其實我地唔係幾溝通到🤦🏻‍♀️ 但係當越野車每次駛過崎嶇嘅路，車身劇烈搖晃，佢都會望住我地自鳴得意地笑。

佢帶我地到達一個圍城，走上一個用沙泥建成，好有戰地感覺嘅城堡。由於城堡太多砂石，我又著住拖鞋長裙，爬上又跣又狹窄嘅樓梯都唔容易，而佢喺我最需要嘅時候，好有力咁一下就拉咗我上去。喺上面望完風景，到落樓梯嘅時候，佢比我先落，然後喺下面一直留意住我，去到一個位我真係落唔到，佢一下秤住我，就抱咗我落去🤦🏻‍♀️ 我得5呎，佢6呎幾，可能覺得抱我輕而易舉吧😚

佢繼續駛架車帶我地去沙漠，一路上，我地停低睇鹽湖、睇沙丘、睇浩瀚嘅沙海...真係好靚。去到一段路，佢突然抄咗一條好多仙人掌嘅小路，一路開車一路四處張望，格外留神，好似好想搵嘢咁。過咗一陣，佢突然停低架車，逕自落咗車。原來，佢一直喺咁大片沙漠中，搵緊唯一一朵花比我地。

之後，佢駛到一個沙丘同我地睇日落，沿路嘅晃動令我地心跳得特別快。車終於停落黎，我地爬到車頂上，望住喺無涯嘅大漠上，一個好似天國之門咁溫柔嘅夕陽。佢居然輕輕攬住我條腰，然後我地一齊望住呢個無價嘅景，乜嘢都無講。

之後我地就要離開沙漠。途中，我地去到一個補給站，佢停低架車，落去搵水洗一洗車上嘅泥沙。本來我係唔洗落車嘅，但我見到補給站外居然有4隻好得意嘅狗仔🤣 Amir仲摸咗佢地幾下☺️ 我忍唔住就落咗車，想去同佢地玩......我不斷逗啲狗仔，但佢地好怕生，無乜理我，有一隻仲跑走咗😂 Amir 見到我咁鍾意狗仔，佢洗完架車，有想幫我逗啲狗黎玩，但唔成功。之後佢居然徙手走去活擒一隻，想比我玩😂 但咁樣搞到狗仔太驚，係咁嗚嗚哀鳴，最後仲跑走埋😂 我無玩到狗仔就上返車走了。

一路從沙漠駛回市區嘅路上，Amir一手攞住軚盤，一手輕輕搭喺我椅背。有幾分鐘嘅時間，佢隻手一路好慢咁想黎搭我膊頭。最後，佢一手開住車，另一手搭住我膊頭，就咁喺大路上駛咗半個鐘.......然後週不時特登飄移，令我要挨去佢嘅方向....要轉檔嘅時候會鬆一鬆手，但之後又會再慢慢搭過我膊頭🤭🤫（唔好問我kimmy做緊乜，佢完全狀況外玩緊電話🤣）

到達市區，我地要落車了。下車後，佢基本上連byebye都無講一句就急急走咗，唔似其他人咁，連ig/電話都無留低。

第二日，我地離開卡尚，搭咗幾個鐘車去到另一個城市。Kimmy 向佢嘅同事打聽，先知原來26歲嘅Amir已經結咗婚，老婆仲啱啱大肚...

😒

衰人欺騙我感情！！！！！！