emiliawyk

食避孕藥 +用月經杯😇 簡直返唔到轉頭，顛覆咗我整個人生🥰

Added 2021-11-23 17:30:23 +0000 UTC

（無碼圖係最底，確定自己想睇先好拉到最底啊😜）

之前都有同大家提過，我由2019年開始，嚟M變到非常奇怪，可以半年唔嚟M，check過曬裏面嘅內臟，冇病冇痛仲好健康😅 咁醫生就建議我食避孕藥，亦都有叫我減少少肥（嗰陣時BMI超過咗少少，而家已經正常返），我兩樣嘢都有跟。

我6月4號開始食避孕藥（個日子唔係我揀的，因為避孕藥係要由嚟M第一日開始食。咁啱得咁橋搞到咁易記，好容易令人聯想到血🙂），至今已經食咗就嚟半年，我覺得真係超級值得，原因如下：

1. 每個月都準時嚟M，可以好好預算

2. 新型藥，食完完全冇水腫或者發胖

3. 可以避孕（如有需要），唔使驚驚下

4. 對我來講係減少左黎M前嘅情緒不穩（時間+程度+出現率），就算有少許不穩，因為而家好準時，都會知道有可能係因為就嚟嚟M所以情緒受影響，突然唔開心嘅時候就知係乜事。

以前我完全不能估算自己幾時黎M，甚至一年都淨係嚟幾次，唔會有心機plan 定買特別好用嘅月經產品，最多留幾條M巾喺度傍身，求求其其，唔覺得好重要咁。

自從一兩年前開始用咗棉條之後，其實我已經覺得之前用M巾係好蠢，因為相較之下，M巾都真係好焗、有啲辛苦。上個月嚟M之後，我就計劃定買月經杯俾今個月用，前幾日終於開始試用。

感覺：除咗一開始有少少頂頂地個子宮嘅感覺（之後已經冇），整體係仲舒服過棉條，連少少up住up住嘅感覺都冇。棉條喺陰道入面都會有少許異物感，覺得有啲嘢黏住鞋鞋地，又會有條棉繩吊住喺出面，間唔中揩到都會有少少唔舒服。但月經杯嘅矽膠表層超級柔軟舒服，用咗好似冇用咁，真係開發咗我嘅新思維。

安全性：近乎完全沒有滲漏嘅情況，戴住嚟瞓覺都得，完全唔使擔心漏M。以往我用棉條，喺瞓覺嘅時候都唔會用，因為棉條長時間放喺入面，有機會引致毒性休克症候群（Toxic shock syndrome），嚴重有可能會死，大家想認識多啲可以Google下。由於月經杯原理不同（不是吸取血液），唔會引致呢個病，所以我喺瞓覺嗰陣都放心使用。之前瞓覺我就會着嗰啲好似尿片咁樣嘅M巾褲，咁先可以唔驚滲漏，但係都係會醃住唔舒服，有時啲血會向後流，成個屁股罅都係，都唔係好舒服😅 而家完全解決晒呢啲問題😍🥰

用法：第一日用嘅時候，我唔係好識點樣攞返出嚟，喺廁所度搏鬥咗一陣，兩隻手指都伸晒入去喺度拉扯，搞到下面闊曬咁😂 後尾我即刻google返，先至發現原來月經杯嘅原理，係捲埋放入咗去之後，佢會喺入面展開，形成真空狀態，所以我係要輕輕力擠壓個杯嘅底部，等佢解除真空狀態先至可以攞出嚟，仲要用少許排泄嘅氣力必佢，好似生仔咁，等佢更接近陰道口😂 知道左方法後，我不費吹灰之力就拉返佢出嚟。暫時呢幾日我都係越用越上手，越來越掌握到點樣放置及取出。

之前我喺Story分享，有好多女仔同我講話塞唔入，亦好多女仔分享話佢哋用過返唔到轉頭。關於塞唔入嗰度，其實市面上有好多不同尺寸嘅月經杯，我應該係揀咗個屬於比較細嘅，個杯摺埋放入去嘅時候，直徑係一寸都沒有，輕易就放到入去，生理上做唔到嘅可能性極低。所以我諗嗰啲女仔可能唔太習慣有異物放入陰道，或者方法唔係好啱（我認為一隻腳舉高放喺廁所咁樣嘅姿勢係比較容易放入），甚至未必好清楚自己個窿窿喺邊、啲角度點樣運作😜

唯一一樣野，就係我冇測試過長時間出街，而需要喺街嗰度換個杯會係點，聽日可能有機會測試😚

結論：嚟緊我將會買多幾條月經褲，下次嚟M嘅時候配合月經杯使用，就算有少許滲漏都唔會怕。一個月經杯本身已經等於幾條棉條，一條月經褲又可以等於幾條棉條，真係又舒服又安全🥰💖因為可以睇到自己有幾多月經，仲可以更加清楚自己嘅身體🥰 我而家已經覺得用過返唔到轉頭🤣💖