最近實踐健康生活的進展🥰 (附圖)
Added 2021-10-11 16:37:08 +0000 UTC（圖：人哋show off馬甲線，我show off肚腩線😆）
話說我由八月頭開始做運動嘅生活，由以前近乎完全唔做運動，變成而家一星期起碼三日運動，做咗兩個幾月到而家都冇話特別瘦咗定點😆
大概9月尾，我開始連飲食都注意多咗。以前我從來唔煮飯，亦都唔食早餐，亦都唔係好飲水，一日都唔知有冇飲到一杯。晏晝做完嘢食返個茶記，之後再做完嘢到夜晚，就出街食或者喺屋企食外賣。
但係而家，我基本上每日都會食早餐，而且都係揀啲健康嘅食物例如生果、雞蛋、雞胸肉、麵豉湯、豆奶。晏晝嘅時候我已經少咗好多食茶記或者啲肥膩嘅嘢，變為食以魚或者雞肉為主嘅健康少少嘅料理，例如魚生飯或者煎魚柳意粉。出街食好難話食得好清，但起碼可以揀下食物嘅種類。到咗夜晚除非我要出去同朋友或者家人食飯，否則我都係喺屋企自己煮，而除非我嗰日朝頭早食得特別清淡，否則我都淨係食菜+雞胸肉/魚柳，如果嗰晚真係特別肚餓先煮多個麵。仲有，我已經好耐冇飲過有糖嘅飲品，出去食飯都係飲凍檸水走甜。
呢種運動+飲食嘅模式改變，令我整個人覺得有活力咗好多。我間唔中都會食下啲肥膩少少嘅嘢（其實只係普通茶記嘅嘢），唔會咁變態淨係喺度食健康餐，不過當我大部份時間都食得健康有營養，間唔中一兩餐食得肥膩咗，我竟然會覺得個胃同埋個肚唔舒服，會有啲想作嘔😂 例如之前有一晚同阿媽食串燒，叫咗個雞皮，我完全唔介意間唔中食得肥嘅，因為人生開心都好緊要，但係食完半塊之後唔舒服左成晚🌝
我好開心我開始咗改善自己嘅生活習慣，雖然體型上唔係好覺，但係我自己係知道有改變
1.個人心情好咗
2.冇成日覺得好攰
3.無再成日周身骨痛
4.冇咁水腫
最重要嘅係，我好想長遠來講變得健康，因為我屋企嗰邊都算係肥底，我阿嬤同其中一個姑媽都係糖尿病併發症過身🥲 而且我身邊太多人身陷政治獄，因為咁樣我都反思多咗自己嘅人生，如果我等佢哋出嚟，幾年後甚至十年後回望，我究竟係咪虛度咗呢幾年？我有冇利用呢幾年嘅時間變成一個更好更強更有能力更健康嘅人？定係我都係日日攤喺度傷春悲秋就算？
所以大家見我雖然運動左一段日子，最近仲開始注意飲食，但係我完全無話介意身形冇乜點樣轉變，因為呢個都唔係我主要嘅目標，唔係想用好短嘅時間去減磅或者令身材變到好靚，而係想自己嘅生活習慣長遠都有所改變，長遠都要變得更加健康。所以我嘅目標唔係放喺一兩個月、半年，而係起碼一兩年以上💗
